شي بقلبي

شـيٍ بـقـلـبـي يامـلا حـايــرٍ فـيـه
شـيٍ تحيـر بـه العـقـول الفـهـامي

مـخـفـيـه بفـوادي ولاودي ابـديــه
وادور الخيـرات شـرقٍ وشــامـي

احتـرت بـه ماشفت شـيٍ يحاليـه
واليـوم ابـا انشد عنه مانيب كامي

سيـلٍ حــدر مع واديٍ غيـر واديه
مـدري حـلالٍ مـاه والا حــرامـي

كانه حـلال وجايـزٍ شرب صافيـه
وش حللّـه يـامفسريـن الـحـلامـي

هـاتــوا تفـاصيـلـه وهـاتـوا معانيه
نـبـي الـدليـل اللي عليه الكـلامـي

نـبـي دليـلٍ يـفـهـم الــدرب ماشيـه
يـمشــي بـه الـتـايـه بليــلٍ ظلامي

يمـشـي به التـايه ويقـدي مـواطيـه
ويشرب قراح الما ليا صار ظامي

لاشـك هـجـسـي يـوم خلا مماشيه
انــه حــرام ومـنـه زود الاثــامـي

احـرم من الـزقــوم مــره وحـاليه
وشربه على الضامي يزيد الهيامي

الله مـن قــلـب هـمـومـه تـقــزيـه
تــدك بـه مثـل الـجـراد التـهـامي

مما جـرى قـامت تـتـله مشـاحيه
تل الرشـا من فوق هدفّ المقامي

روابـعٍ قـامـت تـصيــبه وتـخطيـه
شاف الهوايل واختلاف الاسـامي

مايسـمع الداعـي ليا قـام يـدعيــه
يعــوم في بحـرٍ من الهـم طـامـي

مـاينـتـبـه للــي بـصوتـه ينـاديــه
يــزيــد هـمـه يــوم كـل يـنـامــي

يشــوف وقــت مـاعـرفنـا تـواليـه
وقتٍ يشيـّب من بـسـن الفـطـامـي

هــذا زمـــان كـاثــراتً بـــلاويـه
الـغـيـم يقـلـب فـيـه عــج وكتـامـي

يابعد شـرب الما على كبـد راجيه
ما سيّـل الغبـرا زعـوج الجـهامي

انبيـك يـامـن كلمـة الحـق ترضيه
اعطـيـك ماينـفعك وافـهم مـرامي

قـصـرٍ يـذلك لاتـقـابــل مـبـانـيــه
خله عسـى شـامـخ طويله هـدامي

خله عسى ما صاب اغـادير يفنيه

يـودع منـازِلْه الطـويـله رجـامـي

لـوزان مدخـالـه وطـالت حواميه
شيّـد على الخيـبه قليـل الرحامـي

وحـيٍ يـوريـك الـمـذلـه وتغـليـه
انـا اشهـد انك ميـت القـلب عامي

من لايودك ..لا تـوده وتـرجــيـه
ارفـع مقامـك ياعـزيـز الـمقـامـي

ارفـع مقامـك عن عـدوك وتـوذيـه
ويلحقـك من تركـت رفيقك ملامي

حـق الـرفيـق وواجــبـه لاتخـليــه
يـلزمـك مثـل الـوالـدين الحـشَامـي

اختـر عـزيـز الـجار والحـق تعطيه
شبـلٍ عـلـى هـرجٍ يقـولـه يـحـامـي

مـادك بـه عـرق الـمـذله وطــاريـه
ويسبق على فعل الفضيله الشمـامي

من قارب الاجرب بالامراض يعديه
عــدواه تـسـطى باللـحـم والعظامي

درب الـسـلامـه بيـنـاتٍ مـمـاشـيــه
ودرب العطـب يرّث عليك اللكامي

ابـعـد وقـلبـك نـازح البـعـد يشـفيـه
وتلـقـى عن الـدار البغيضه مقامـي

دارٍ بــدار وداعــي الـذل عـاصيـه
ولاتقـبـل الـذلـه نفـوس الـكـرامـي

الـذل مـوتٍ ..حـايـمـاتٍ ضـوامـيـه
ادخل على منّزل فـروض الصيامي

عن مقـعـدٍ بـالـذل عيـنـك تـراعـيـه
الـمـوت عنـد الذل أمـن وسـلامـي

يـرضى المـذله من تـردت هـقاويه
والـذل يجفـل منـه قـلب العصامي

والعبـد له ربٍ عـن النـاس ..يغنـيه
ولـولاه مـاصاب الهـدف كل رامي

محمد الاحمد السديري

اسود من الصاج

الله مـن هــم بــروحـي ســهــجـهـا
بخافى ضميرى فـى كنيـن الحشا لاج

احـــر مـن نــار تــواقــد وهـــجــهـا
منها خطر روحـى على ســلك ديباج

وعين عـسـى المولى يعـجل فـرجها
يفـوح نـاظـرهـا كـمـا عــيـن هــداج

استـرسلت للـدمع من ما رهـــجـها
غـــيـظ يكظ عبارها مثل الامـواج

كـــم واحــد لـه غـايـة مـا هـرجها
يـكـنـها لـو هــو للادنـين مـحــتـاج

يخاف مـن عــوجا طــوال عـوجها
هـرجـة قـفا يركض بها كـل هـراج

يقضب عـليك المخطيه من حججها
حـلـو نبـاه وقلبـه اسود من الصـاج

الله خـلــق دنـيـا وســاع فـجــجـهـا
وعن ما يريب القلـب لك كم منهاج

والرجل وان شـطت ليـاليك سجها
عـســى تـواليـها تبـشــر بالافـراج

محمد الاحمد السديري

مبـسم هيـا..

كان لرجـل من اهل الحريق - ديرة الشاعر المعروف محسن الهزاني والمشهور بقصائد الغزل - بنت اسمها هيـا وكان جمالها وحسنها باهر0 وكان من حرص والدها عليها مسكنها في روشن والروشن عبارة عن غرفه تكون في العاده في اعلى البيت او بالاصح اعلى مكان في بناء البيت .وكان مايجي هيـا الا خادمتها ومشاطتها اللي تجي لها كل اسبوع تمشط شعرها واصر محسن انه يشوف هالبنت وقام يراقب البيت ويحتال لكي يجد له مدخلا على روشن هيا اللي هي موجوده فيه . وجـد محسن أن الروشن له مـنفذ صغـير يدخـل منه الماء الذي يصب من ساقيه على بئر قريبه فلم يجد طريقه غير الـنزول الى البئر وصـار يتعـلـق بحـبال الغروب اللي تسحبها السواني حـتى دخـل الى القصـر وكان لـه ما أراد وجلـس هـناك ثلاث أيام ولم يعلم احد بوجوده وفي رابع يوم سمع صوت اقدام المشاطه جايه علشان تمشط ذوايب هيا 0 وهيا اثناء تمشيطها قامت تغني وكانت تردد هالبيت :

أصفـر معصفـر ليت محسن يـشـوفه ..........................تـوّه على حد الغـرض ما بعـد لـمس

وعند سماع محسن الهزاني للبيت طلع وقال :

أربع ليال ومرقدي وسـط جـوفــــه ......................... الـبارحه واليـوم وامـس وقـبـل امـس

وهرب وكان رفاقه قد افتقدوه 00 ولما اتاهم حاولوا يعرفون منه اين هو طول هذه المده 0 ولكنه لم يجيبهم ، وكان احدهم ذكيا ولما لمح البرق هالبرق يشبه مبسم هيا 00 فانشد محيسن الهزاني قائلاٍ:

قـالوا كـذا مـبسـم هـيـا قلت.. لا لا

بـين الـبروق وبـين مبسم هيا.. فرق

ويـالله ... بــنــوٍ مـدلـهـم الـخـيـالا

طـافح ربـابه مثل شرد المها الزرق

لا جـا عـلى الـبكرين ..بـّنا الحلالا

ولاعـاد يفصـل رعـدها عن البـرق

يـسقي غـروسٍ عـقب ماهي ..همالا

وحط الحريق ديار الاجواد له طرق

يـسـقي نـعـامٍ ثــم يـمـلا ...الـهيـالا

ويصبح حـمامه ساجعٍٍ يلعب الورق

جـريت انـا صوت الهوى باحتمالا

فـي وسـط بـستانٍ سقاه اربعٍ فـرق

طـبّيت ... مـع فـرعٍ جـديد الـحبالا

وظهرت مـع فرعٍ تناوح به الورق

روشـن هـيا لـه فـرجتينٍ ...شـمالا

بابٍ على القبله وبابٍ على الشرق

وضـحكة هـيا لـه بالظلام ..اشتعالا

مـا بـين ضحكتها ونور القمر فرق

بـرقٍ تـلالا .... بـأمر عـز الـجلالا

واثره جبين صويحبي واحسبه برق

يـا شـبه صـفرا طار عنها الجـلالا

طـويلة الـسمحوق تنزح عن الدرق

لـه ربـق احـلى من ...حليب الجزالا

واحلى من السكر الى جاء من الشرق

حـنيت انـا حـنـة هـزيـل الـجـمـالا

يـنقض ردي الـخيل قد حسة الفرق

ويــا قـلـةٍ بـي عـالـيـات الــجــبـالا

مـاها قـراح مـيـر من دونها ..غرق

مـاعـاد لـلصبـيان فـيها .. احـتـمـالا

مـن كـود مـرقاها .. يديهم لها طرق

قـالوا تتوب من الهوى قلت ..لا لا

الا ان تتوب رماح علوى عن الزرق

قـالوا تتوب من الهوى قلت .. لا لا

الا ان يـتوبون الحنـاشل عن السـرق

قـالوا تتوب من الهوى قلت .. لا لا

الا ان تتوب الشمس عن مطلع الشرق

ياحسين

الامير عبدالله بن رشيد مؤسس امارة ال رشيد بحائل حينما كثرت النزاعات بينه وبين العلي على الحكم واضطر الى الخروج من حائل واللجوء الى مكان يظل فية لفترة حتى هدوء الاوضاع ، لحقت به زوجته مع احد العبيد وكان يدعى حسين وبعد ان اطمئنت عليه امرهم بالعودة لحائل خوفا عليها ، ولآن الآرض صخريه وكانت زوجته تمشي حافية القدمين وهي لم تعتد على ذلك فقد احفى الصخر قدميها واخذت تتمايل بمشيتها ولما رأى الامير عبدالله ذلك رق لحالها وقدّر ماهي به وقال :

ارم النعول لداعج العيـن ..ياحسيـن

واقطع لها من ردن ثـوبـك ..ليـانـه

ياحسين ..والله مـالها سبـت رجلين

ياحسـين شيّب باالضمير ..هكعانه

جنّب حفـاف القـاع واتبـع بـها الليـن

واقصر خطا رجليك وامش مشيانه

وان شلتها ياحسين ترى مابها شين

حيث الخـوي ياحسيـن مثـل الآمانه

مايستـشك ياحسيـن كـود الردييـن

ولاتـرى الطيـّب ... وسيـعٍ بطانـه

الحمد للباري

الحمـد للبـاري .. فـزع لمن شكا له
والحمد له ثاني ..على كل الاحوال

والحمـد له ثالـث .. بـقـدرة فعـالـه
حمـدٍ كثـيـرٍ عـد .. ما قايــل قــال

وعداد ما فوق الوطا من ..رمالـه
او ساح ظل ..من العوالي للاسهال

وعــداد مـا ترمي.. لـواقــح خيـاله
بســحٍ وتـسـكابٍ .. وديـــمٍ وهـمّــال

كل الشكــر لـه والثـنـا والـجـلالـه
سبـحان من هو كلما راد .. فعّال

رب السما رزق المـلا .. من نواله
محي الهشيم .. الميت الدارس البال

مولاي .. عازل شمسـها عن ظلاله
سيدي ومسنادي ..الى صكنا الجال

كـم ضيـقةٍ من مـنـته جـت .. وزالـه
وعـادت بعـزٍ .. مـاهـقيـناه بالـبـال

الـحمــد لله . . مـا كـرهـنـا الـقـالـه
الا ان تصيـرعقوبتـه ..عـز واقبـال

يـا مـا طـلبـنـا ..كـل مـن به شـكـالـه
نبغي الركود من أهل نجدٍ ولا ضال

من عقب ما عجزوا عني .. بالغياله
شبوا لنار الحرب بالقيـظ .. صّوال

ومن شب نار الحرب ..قاد اشتعاله
وصارت عقوبتـه بعـد ..ذل واذلال

هـذا وفعـل الشـر .. للـي سعـى لـه
يرميـه بالميـدان من غيـر .. حبّال

والبغـي.. كم ناسٍ خلـوا من رجالـه
يا ما هلك بالبغي من ماضي اجيال

عاد خلاف الزود شف وش جرى له
يا عـونـة الله ما من الحي ... عقّال

من قال ذا فعلي فهو … من هباله
الله معـاونـي علـى من علي عـال

اللي نبـي .. لـولا الولـي ما ننـالـه
ميرالولي يسعى .. والانام غفّال

والكل يكتب بالقلـم .. ما جـرى له
شره وخيراته .. من الخالق العال

يرفـع وياضع بالقـدر .. من نواله
وتدبير خلقه ما لنا فيـه .. مدخـال

اللـي علينا الجـار .. نـرفـي خمـاله
ونفزع لمن جانا من الضيم ..دخّال

والضيـف يقرى .. حين تبرك رحاله
من غير هذا المحتري ما نـهـج خال

ومن جا يريد الزين ..يعطى سـواله
عن عاني الله .. ما قطعنا له أوصال

وان جـا صديـقٍ من عـدوٍ.. غيـاله
عميلنا نرخص له .. الحـال والمال

يا من بنـا سـرحه ..وضـايع حـلاله
ولا بات في قلبه من الخوف ..ولوال

والشـر .. نـدفـع جـانـبـه بالسهاله
ولانـا لتـثـويـرهـ مـن النـاس.. قبّـال

لكن اليـا ركـب ..الرشـا بالمـحـاله
واستثقلت ..ماني من الحرب مّلال

نرسـي كمـا ترسي رواسـي ..جباله
ماتنهـزع .. من وطي حافـي ونعّـال

ومن عاف صافي الما..وكدّر زلاله
اسقيــه كــدر .. ليـن يـروى ويكتـال

وان زاد زدنـا لـه .. بـقـو وغثـالـه
بحيـل من لافـي قواضيه .. محتال

وخـلاف ذا.. يـاللـي تودي الرساله
في صفح مصقول عليه ..القلم سال

سـلام من هو له .. على شــف باله
ومـشـاهـد ..اللـي للثـقـيـلات حمّـال

غـش الحـريـب اللـي بـراسـه صعاله
عز الضعيف وريف ضيفه بالاعجال

بالجـود .. يتـعـب مـن يعـدد خصالـه
كـل المـراجـل حـاشـها ..دق وجـلال

سـلــّم عـليــه ولا تـقـول لـه مقـالــه
الا ان نشـد عني وعن حالـتي سال

وقال اخبرن عن صاحبي كيف حاله
عطـه الجـواب اللـي كتبـنا والامثـال

قل له يقـول لك ياخلف من غـدالـه
من الحي والميـت ..من العـم والخال

ركبوا ..علـى عوص النجايب ..عياله
يـبـرى لـهـم يا بـوسمـي ..كـم خيـّال

جـوهـ الضحى يا شيـخ ما هي نطاله
وصادوا المارادوا ..على كل مشوال

يوم الخطوط أقفـت ..وهو ما قـزالـه
جـاه المقـري ..والحـق الاول التـال

هذاك حق الملك ياللي ..عصى له
من عقب مادزيت له ..كم مرسال

عيا يطيع اللي نصيح ..حكـى له
فرحان وابن سبيت ما لقّى لهم بال

ولا طـاع يـدّي.. ركبـنا مـع جماله
وازريت من كثر الشكاوي والارسال

يبغى يرد اللي مضى من ..هبـاله
واللي مضى ..عوج سراميد وطوال

زادوا وبـادوا.. من هبـايب شـمـاله
كل له الله يـوم .. تحسيـب الاعمـال

ويمناي ... ما تـرضى بزايــد شمـاله
واعطي احقوق اهل المعالي والارذال

والله .. لـولا يـوم كـربــة حــبــالــه
خوفك وغيظك ان نزيده.. بالاشعال

ومن عـقـب شيمتنا .. تبـدل فسـاله
يا شيـخ يا تالي كـريميـن الاسلال

ونـشـوف حـرب اللـي..يـبـاهـي بماله
حتى نشوف اللي على الحرب صماّل

شـكيـت دقــه قـبـل يـلـحـق جــلالــه
هــذا كـلامــي لـك ولانـي مـنـه ذال

ومن خالف امرك لو صديق.. فناله
مـن اول طـاعـون .. واليـوم سـلاّل

الـسـيـف للتـايـه .. ستـاده حنـى لـه
واندل به من هو عن الدرب ..ميّال

ولـيـا كـبـا حـده ..مـحـشـنـا صـقـالـه
ولاهو من الشطات والضرب كّلال

فـان كـان مـا شـا فـوا تــوالي فعـاله
وصـاروا بقـايـاهـم فـذولاك ..جهّال

وعبـيـدٍ ..اللــي لا عـدمـنـا خيـالـه
حطه لهـم مـولاي ..نجـم وزلـزال

هـذي علـوم ديـار ..مـن لا صفا له
..الابتقصيف الآجـال مشروب ماها

صفيـتها بالسيـف ..ماهـي جماله
وثنيـت للرّثـاع .. بالقيـد وعـقـال

ولا نـفـوز ..الا ونــروي سـلالـه
من دم هامات العدا .. عل وانهال

هــرجٍ قـلـيـل .. لا تكـثّـر جـدالـه
قـلبـك دليـلك .. لاتفكـر بالاقـوال

والصدق يشهد له .. وغيره رذاله
وقـولٍ بلا فعلٍ .. الى قيـل بطّـال

من قال قـول .. ترجمـت له فعاله
لاعاش ..من يقصرمنه قدرمثقال

شهـودي بجلـدي ..والعدو به بداله
والناس تدري .. بالجدايد والاسمال

وان كان بـي اليوم ..تقصر حباله
اعزم ..ولاتنظر لراضي و زعّال

دنيـاك تظهـر ..من خوافـي لياله
ولاتكن من عقـب ماقلـت ..غفّال

وصـلاة ربـي عــد .. سـاعٍ سـعـاله
وما التج حج بين .. هاذيك الاميال

وماتجهول فـوق الانضا من رحاله
على نبي .. خـصـه الله بالارسال

الامير
عبدالله ال رشيـد